၎င်းဒေသမှ ထိုင်းနိုင်ငံ ကန်ချနာဘူရီသို့ဖောက်လုပ်မည့် လမ်းပိုင်းနှင့်မလွတ်သည့် ဒေသခံများပိုင်ဆိုင်သည့် ဥယျာဉ်ခြံမြေများကို စတင်ရှင်းလင်းလျှက်ရှိပြီး ၎င်းခြံမြေများကို ဒေသခံများမှ “မည်သူတစ်ဦးတစ်ယောက်၏ ခြိမ်းခြောက်မှုမရှိဘဲ မိမိဆန္ဒအရ သဘောတူညီစွာရောင်းချလိုပါသည်” ဟုရေးသားထားသော စာရွက်ပေါ်တွင် အတင်းအဓမ္မလက်မှတ်ထိုးခိုင်းလျှက်ရှိသည်။
“ကျွန်တော်တို့ကမရောင်းချင်ပါဘူး။ သူတို့ကလက်မှတ်မထိုးရင် ဘာမှပြန်ပေးမှာမဟုတ်ဘူးပြောတော့ ထိုးရတာပါပဲ” ဟု ဒေသခံ ဥယျာဉ်ခြံပိုင်ရှင်တစ်ဦးကပြောသည်။
အဝေးပြေးလမ်းပိုင်းနှင့်မလွတ်ကင်းသည့် နေရာများကို ၂၀၀၉ နှစ်ကုန်ပိုင်းကစတင်ကာ ဖယ်ရှားရှင်းလင်းခဲ့ပြီး ထိုအချိန်က ဒေသခံများကို ကြိုတင်အသိပေးခြင်းမရှိဘဲ ဥယျာဉ်ခြံမြေများအတွင်းသို့ မြေတူးမြေကော်စက်ကြီးများဖြင့် ၀င်ရောက်ရှင်းလင်းခဲ့သည်ဟု နဘုလယ်ဒေသအတွင်းရှိ သပြုချောင်း ကျေးရွာမှ ဥယျာဉ်ခြံမြေ ၁၅ ဧကခန့်ဆုံးရှုံးခဲ့သော ခြံပိုင်ရှင်တစ်ဦးကပြောသည်။
နဘုလယ်ဒေသတွင် တွေ့ရသော ခြံမြေများရှင်းလင်းရန်သယ်ယူလာသည့် ယန္တရားကြီးများ၎င်းပိုင်ဆိုင်သည့်ဥယျာဉ်ခြံမြေကို အလယ်မှဖြတ်ကာလမ်းဖောက်လုပ်ခဲ့သောကြောင့် ခြံနှစ်ပိုင်းဖြစ်သွားပြီး နစ်နာဆုံးရှုံးမှုအတွက် တနင်္သာရီတိုင်းဒေသကြီးဝန်ကြီးချုပ်ထံသို့ ယခုနှစ် ဇူလိုင်လအတွင်းက စာရေးသားတင်ပြခဲ့သော်လည်း ယနေ့အချိန်ထိမည်သူကမျှလာရောက်ကမ်းလှမ်းခြင်းမရှိသေးကြောင်း၎င်းကဆိုသည်။
“ ခယက(ခရိုင်အုပ်ချုပ်ရေးမှူး)ကတော့ နေပြည်တော်ကစေ့စပ်ညှိနှိုင်းရေးမှူးလာပြီး ဆွေးနွေးညှိနှိုင်းပေးမယ်လို့တော့ ပြောတယ်။ အခုထိတော့ ဘယ်သူမှမလာသေးဘူး” ဟု ၎င်းခြံပိုင်ရှင်ကပြောပြသည်။
၎င်းအချိန်က တိုင်းဒေသကြီးဝန်ကြီးချုပ်ဦးခင်ဇော်ကို ယခုအချိန်တွင် တာဝန်မှအနားပေးလိုက်ပြီဖြစ်သည်။
အသီးအပွင့်စားနေရသောအပင်များကိုတစ်ပင် သုံးသိန်းကျပ်နှင့် အသီးအပွင့်မစားရသေးသောအပင်များကို တစ်ပင် တစ်သိန်းပေးမည်ဟု ဒေသခံများက အရပ်စကားကြားထားပြီး အပင်တစ်ပင်၏ အမှန်တစ်ကယ်တန်ဖိုးမှာ ထို့ထက်ပိုကြောင်းဒေသခံများကပြောသည်။
ဒေသခံများပိုင်ဆိုင်သော ဥယျာဉ်ခြံမြေများတွင် ကွမ်းသီး၊ အုန်း၊ သီဟို၊ ငှက်ပျော၊ ဒူရင်း၊ ကျွဲကော၊ ငရုတ်ကောင်း စသဖြင့်စားပင်သီးပင်များစွာရှိသည်ကိုတွေ့ရသည်။
ထားဝယ်အထူးစီးပွားရေးဇုန် အထောက်အကူပြုလုပ်ငန်းအဖွဲ့ ဥက္ကဌ ဦးတင်မောင်ဆွေက “ ပေးတာမယူရင် ဘာမှပြန်ရမှာမဟုတ်ဘူး” ဟုပြောဆိုခဲ့ဖူးသည်ဟု ဒေသခံများကပြောသည်။ ၎င်းကိုဒေသခံများကကြောက်ရွံ့သောကြောင့် “ မင်းကြီး” ဟု ခေါ်ဝေါ်ကြသည်။
စီမံကိန်းရုံးပြုလုပ်ရန်အတွက် ဖယ်ရှားရှင်းလင်းခံခဲ့ရသော ခြံပိုင်ရှင်များမှာ ယခုအချိန်ထိ နေစရာနှင့် စိုက်ပျိုးစားသောက်စရာနေရာမရှိသောကြောင့် ဘ၀ရပ်တည်မှုအခက်အခဲဖြစ်နေသည်ဟု ဒေသခံများကပြောသည်။
“မြန်မာစကားသံကြားရင်ကိုကြောက်နေရတယ်” ဟု ဒေသခံကျေးရွာသားတစ်ဦးကပြောသည်။ ၎င်းဒေသတွင် ထားဝယ်ဒေသသုံးစကားကိုသာပြောဆိုကြပြီး မြန်မာစကားပြောဆိုသူများမှာ အာဏာပိုင်အဖွဲ့အစည်းများသာဖြစ်သည်ဟု ဆိုလိုခြင်းဖြစ်သည်။
အထူးစီးပွားရေးဇုန်တည်ဆောက်မည့်နေရာသည် ထားဝယ်ခရိုင်၊ ရေဖြူမြို့နယ်အတွင်းရှိ နဘုလယ်ဒေသတွင် တည်ရှိပြီး စီမံကိန်းဧရိယာသည် ၂၅၀ စတုန်ရန်းကီလိုမီတာကျယ်ဝန်းသည်ဟု ထားဝယ်အထူးစီးပွားရေးဇုန် အထောက်အကူပြုလုပ်ငန်းအဖွဲ့၏ စာရင်းများကဆိုသည်။
No comments:
Post a Comment